ފީފާ ވޯލްޑް ކަޕް 2026ގައި ތަފާތު މޮޅު ކުޅުމެއް ދައްކައި ގިނަ ބައެއްގެ ލޯބި ހޯދި ކޭޕް ވާޑޭގެ ގޯލްކީޕަރު ވޮޒީނިއާ، ޗިލީގެ ނަންމަޝްހޫރު ފުޓުބޯޅަ ކުލަބު ކޯލޯކޯލޯއަށް ބަދަލުވުމަށް އެއްބަސްވެއްޖެކަން އެ ކުލަބުގެ ރައީސް އަނިބަލް މޮސާ ކަށަވަރުކޮށްދެއްވައިފިއެވެ.
ޑިޕޯޓްސް ލިމާޗޭ އާ ދެކޮޅަށް ކުޅެން ހަމަޖެހިފައިވާ މެޗުގެ ކުރިން މީޑިއާތަކަށް މައުލޫމާތު ދެއްވަމުން މޮސާ ވިދާޅުވީ، ކޯލޯކޯލޯގެ އާ ކުޅުންތެރިޔާގެ ގޮތުގައި އުމުރުން 40އަހަރުގެ ވޮޒީނިއާ ވަރަށް އަވަހަށް ޗިލީއަށް ދަތުރުކުރާނެ ކަމަށެވެ. އަދި އޭނާގެ މެޑިކަލްގެ ކަންކަން ފުރިހަމަކުރުމަށް ފަހު، އެސްޓާޑިއޯ މޮނިއުމެންޓަލް ދަނޑުގައި ސަޕޯޓަރުންގެ ކުރިމަތީގައި ރަސްމީކޮށް އޭނާ ތައާރަފުކުރުމުގެ ކަންކަން ކުރިއަށްދާނެކަން މޮސާ ވަނީ ފާހަގަކުރައްވާފައެވެ.
ދުނިޔޭގެ އެންމެ ޝަރަފުވެރި ފުޓުބޯޅަ މުބާރާތުގައި ވޮޒީނިއާ ދެއްކި ހުނަރުވެރިކަމުގެ ސަބަބުން މިފަދަ ބޮޑު ފުރުސަތެއް އޭނާއަށް ލިބުން ހައްގުކަމަށް މޮސާ ވިދާޅުވިއެވެ. މީގެ އިތުރުން މޮސާ ގަބޫލުކުރައްވާ ގޮތުގައި، މުޅި ދުނިޔެއަށް މަޝްހޫރުވެފައިވާ މިފަދަ ކުޅުންތެރިއަކު ގެނައުމަކީ ކުލަބުގެ ވިޔަފާރިއާއި މާކެޓިންގ އިތުރަށް ފުޅާކުރުމަށް ވެސް ހުޅުވިގެންދާނެ ވަރަށް މުހިންމު ދޮރެކެވެ.
ޕޯޗުގަލްގެ ދެވަނަ ޑިވިޝަނުގައި ވާދަކުރަމުން އައި ޗާވޭސް ދޫކޮށްލުމަށް ފަހު ވޯލްޑް ކަޕަށް ނުކުތް ވޮޒީނިއާ ވަނީ މުބާރާތުގައި ގިނަ ބައެއްގެ ހިތްތަކުން ޖާގަ ހޯދާފައެވެ. ނަތީޖާއެއްގެ ގޮތުން ފީފާގެ ސަޕޯޓަރުންގެ ޑްރީމް ޓީމުގައި ވެސް އޭނާ ހިމެނުނެވެ. އަލަށް ވޯލްޑް ކަޕްގައި ވާދަކުރި ކޭޕް ވާޑޭގެ ގޯލް ބަލަހައްޓައިދީ، މުބާރާތުގެ ތަށި އުފުލާލި ސްޕެއިން އަތުން މެޗު ލަނޑެއް ނުޖެހި އެއްވަރުކުރުމުގައްޔާއި، ދެވަނަ ބުރުގައި މުބާރާތުގެ ރަނަރަޕް އާޖެންޓީނާއާ ދެކޮޅަށް ކުޅުނު މެޗު އިތުރު ވަގުތާ ހަމައަށް ގެންގޮސްދިނުމުގައި ވޮޒީނިއާގެ ދައުރު ވަރަށް ބޮޑެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.