އެފްއޭއެމްގެ ބިމެއް ހިލޭ ދޫކުރި މައްސަލައިގައި ޤާނޫނީ ފިޔަވަޅު އަޅަނީ

މާފަންނު ސްޓޭޑިއަމް ސަރަހައްދުގައި ފުޓްބޯޅަ ދަނޑެއް ތަރައްޤީކުރުމަށް ސަރުކާރުން އެފްއޭއެމަށް ދީފައިވާ ބިމެއްގެ ތެރެއިން ބައެއް، އެއްވެސް ކުއްޔެއް ނުނަގާ ގޮތަށް 25އަހަރުގެ މުއްދަތަކަށް އަމިއްލަ ކުންފުންޏަކަށް ދޫކޮށްފައި ވާތީ، އެކަމުގައި ޝާމިލުވާ ފަރާތްތަކާމެދު ޤާނޫނީ ފިޔަވަޅު އެޅުމަށް އެ އެސޯސިއޭޝަނުން ފާސްކޮށްފިއެވެ.

އެފްއޭއެމްގެ އެގްޒެކެޓިވް ކޮމިޓީގެ 14ވަނަ ބައްދަލުވުމުގައި މި މައްސަލައާމެދު މަޝްވަރާކުރުމަށް ފަހު ނިންމާފައި ވަނީ، ފުޓްބޯޅަ ތަރައްޤީކުރުމަށް ހުރަސްއެޅޭ ގޮތަށް އެ ބިމުގައި ހަދާފައިވާ ވަގުތީ ގުދަންތައް ނަގައި، އެ ސަރަހައްދު ހުސްކުރުމުގެ މަސައްކަތް ޝަރުއީ ނިޒާމުގެ ތެރެއިން ކުރިއަށް ގެންދިއުމަށެވެ. މީގެ އިތުރުން، ސްޓޭޑިއަމްގައި ޤަވާއިދާ ޚިލާފަށް ހިންގަމުންދާ އެހެނިހެން ގުދަންތައް ވެސް ހުސްކުރުމުގެ އަމަލީ މަސައްކަތް އެ އިދާރާއިން މިހާރު ވަނީ ފަށާފައެވެ.

އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ ދައުރުގައި ހިނގާފައިވާ މި މުއާމަލާތުގެ ދަށުން، 2023ވަނަ އަހަރުގެ ކުރީކޮޅު "ފިއުޗަރ ހޯމްސް"އަށް 2،700އަކަފޫޓުގެ ބިމެއް ވަނީ ހަވާލުކޮށްފައެވެ. ހިލޭ ދޫކުރި މި ބިމުގައި އެ ކުންފުނިން ދެ ބުރީގެ ގުދަނެއް ހަދާފައިވާއިރު، ކުލީގެ ބަދަލުގައި އެ ސަރަހައްދުގައި ހުރި ކުނިތައް ނައްތާލުމަށް 1.8މިލިއަން ރުފިޔާ ހޭދަކުރިކަމަށް އެ ފަރާތުން ބުނެއެވެ. ނަމަވެސް، މިއިން އެއްވެސް ކަމެއް ސާބިތުކޮށްދޭނެ ރަސްމީ އެއްބަސްވުމެއް އެފްއޭއެމްގެ އިދާރާގައި ފެންނަން ނެތްކަމަށް އެ އެސޯސިއޭޝަނުން ކަށަވަރުކޮށްދެއެވެ.

އިމާރާތްކުރުމާ ބެހޭ ވުޒާރާއާއި މާލެ ސިޓީ ކައުންސިލުން ނަގަން ޖެހޭ އެއްވެސް ހުއްދައެއް ނުވަތަ ފާސްކުރަންޖެހޭ ކުރެހުމެއް ނެތި މި ގުދަން ބިނާކޮށްފައިވާއިރު، މިއީ ފީފާގެ އެހީތެރިކަމާ އެކު ހިންގާ "ފޯވާޑް ޕްރޮޖެކްޓް"އަށް ދިވެހި ސަރުކާރުން ބައި ގަރުނުގެ މުއްދަތަށް އެފްއޭއެމަށް ދީފައިވާ ބިމެކެވެ. މީގެ އިތުރުން، އެ އިމާރާތުގެ އެކި ބައިތައް އެހެން ފަރާތްތަކަށް ކުޑަ އަގެއްގައި ކުއްޔަށް ދީފައި ވަނީ ފީފާގެ އެއްވެސް މަޝްވަރާއެއް އަދި އެފްއޭއެމްގެ ހިންގާ ކޮމިޓީގެ ރަސްމީ ރުހުމަކާ ވެސް ނުލައިކަން އެ އިދާރާއިން ފާހަގަކުރެއެވެ.