ރެކޯޑް އަދަދަކާ އެކު ދިރާގު ރޯޑް ރޭސް އަންނަ ނޮވެމްބަރު މަހު

ދުނިޔޭގެ އެތުލެޓިކްސް ރޭންކިންގައި ގުނޭ ގޮތަށް، ރާއްޖޭގައި ބާއްވާ އެންމެ ބޮޑު ދުވުމުގެ ހަރަކާތް ކަމަށްވާ "ދިރާގު މޯލްޑިވްސް ރޯޑް ރޭސް 2026"ގެ 17ވަނަ މުބާރާތް، ފަސްހާހަށް ވުރެ ގިނަ ބައިވެރިންނާއެކު އަންނަ ނޮވެމްބަރު މަހުގެ 20ވަނަ ދުވަހު ހުޅުމާލޭ ސެންޓްރަލް ޕާކުގައި ބޭއްވުމަށް ނިންމައިފިއެވެ.

މުވާސަލާތީ ކުންފުނި ދިރާގުން އިންތިޒާމުކޮށްގެން ކުރިއަށްގެންދާ މި ހަރަކާތުގައި މިއަހަރު 5،500އަށް ވުރެ ގިނަ ދުވުންތެރިން ވާދަކުރާނެއެވެ. މިއީ ރާއްޖޭގެ ތާރީޚުގައި ވެސް އެއް އިވެންޓެއްގައި މިހާ ގިނަ ބަޔަކު ދުވާ ފުރަތަމަ ފަހަރެވެ. ފުރަތަމަ ކަނޑައެޅި 4،000ޖާގަ ވަރަށް އަވަހަށް ފުރި، އާންމުންގެ ފަރާތުން ލިބުނު ބޮޑު ތަރުހީބާ ގުޅިގެން ޖާގަ އިތުރުކުރަން ޖެހުނުކަން އެ ކުންފުނިން ވަނީ ފާހަގަކޮށްފައެވެ.

މި ފަހަރުގެ ރޭހުގެ އެންމެ ހާއްސަ އެއް ކަމަކީ މިއީ "ވޯލްޑް އެތުލެޓިކްސް ރޭންކިންގް ކޮމްޕެޓިޝަން"އެއްގެ ގޮތުގައި ބައިނަލްއަގުވާމީ ފެންވަރުގައި ރަސްމީކޮށް ބަލައިގެންފައިވާ އިވެންޓަކަށް ވުމެވެ. އެހެންކަމުން، މި މުބާރާތުން އެތުލީޓުން ހޯދާ ވަގުތުތަކާއި ނަތީޖާތައް ބައިނަލްއަގުވާމީ ރަސްމީ ރޭންކިންގައި ހިމެނިގެންދާނެއެވެ.

ހުޅުމާލޭގައި އޮންނަ މި ދުވުމުގައި ހިމެނެނީ 5ކިލޯމީޓަރާއި، 10ކިލޯމީޓަރުގެ އިތުރުން ހާފް މެރަތަންއެވެ. އަދި މީގެ އިތުރުން މުޅިން އަލަށް ތައާރަފުކުރި ޓީމު އިވެންޓްތައް ވެސް މިއަހަރުގެ ރޭހުގައި ފެނިގެންދާނެއެވެ. ދިރާގުން މައުލޫމާތުދޭ ގޮތުގައި މި ހަރަކާތް ބޭއްވުމުގެ އެންމެ ބޮޑު ބޭނުމަކީ ދުޅަހެޔޮ ދިރިއުޅުމަކަށް މީހުން އަހުލުވެރިކުރުވައި، އެކުވެރި މާހައުލެއްގައި ކަސްރަތު ކުރުމުގެ ފުރުސަތު ހޯދައިދިނުމެވެ.

މި ހަރަކާތަކީ ވޯލްޑް އެތުލެޓިކްސްއިން ސެޓިފައިކޮށްފައިވާ ރޫޓެއްގައި ދުވާ، އަދި "އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް" (އެއިމްސް)ގެ ކަލަންޑަރުގައި ޖާގަ ހޯދާފައިވާ ރާއްޖޭގެ ހަމައެކަނި ބައިނަލްއަގުވާމީ ދުވުމެވެ. ކޮންމެ އަހަރަކު ވެސް މި ހަރަކާތް ގުޅިފައި ވަނީ ކުޑަކުދިންގެ ހައްގުތައް ހިމާޔަތްކުރުމާއެވެ. އެގޮތުން ކުޑަކުދިންގެ ރައްކާތެރިކަމަށް ވަކާލާތުކުރާ ޖަމިއްޔާތަކަށް ފަންޑު ހޯދުމުގެ މަގު މި ފަހަރު ވެސް ވަނީ ފަހިކޮށްދީފައެވެ.