ވެލެންސިއާގެ ހެޑް ކޯޗާއި ސީއީއޯއަށް މަގާމު ގެއްލިއްޖެ

ސްޕެނިޝް ލީގުގެ އައު ސީޒަނުގައި ޓީމުގެ ނަތީޖާތައް އިންތިހާއަށް ދަށްވެ، ތާވަލުގެ އެންމެ ފުލަށް ވެއްޓުމާ އެކު، ވެލެންސިއާގެ މެނޭޖަރު ކާލޯސް ކޯބެރަން އަދި ޗީފް އެގްޒެކެޓިވް އޮފިސަރު (ސީއީއޯ)ރޮން ގޯލޭ ވަޒީފާއިން ވަކިކުރަން އެ ކުލަބުގެ ބޯޑުން ނިންމައިފިއެވެ.

މި ފިޔަވަޅު އަޅާފައިވަނީ، މިހާތަނަށް ލީގުގައި ކުޅުނު ފަސް މެޗުން އެންމެ ޕޮއިންޓެއް ލިބި، ސަޕޯޓަރުންގެ ފަރާތުން ކޯޗާއި މެނޭޖްމަންޓަށް ވަރަށް ބޮޑަށް ފާޑުކިޔުން އަމާޒުވެފައިވާ ދަނޑިވަޅެއްގައެވެ. ކުލަބުން ނެރުނު ރަސްމީ ބަޔާނެއްގައި ބަޔާންކޮށްފައިވަނީ، މިއީ ފުޓްބޯޅައިގެ ކަންކަން ރޭވިފައިވާ ގޮތާއި މެނޭޖްމަންޓުގެ އޮނިގަނޑު މުޅިން ބަދަލުކޮށްލުމުގެ ބޭނުމުގައި ނިންމި ނިންމުމެއް ކަމަށެވެ. މައިގަނޑު ދެ މަގާމުގައި ތިބި ފަރާތްތަކުގެ އިތުރުން، ކޯބެރަންގެ އެސިސްޓަންޓުންނާއި ގޯލޭގެ ދަށުން މަސައްކަތްކުރަމުން ދިޔަ އިދާރީ ހަތަރު މުވައްޒަފަކުވެސް ވަނީ ކުލަބުން ފޮނުވާލާފައެވެ. ދާއިމީ ކޯޗެއް ހަމަޖެހެންދެން ޓީމުގެ ފަރިތަކުރުންތަކާއި މެޗުތަކުގައި އިރުޝާދުދިނުމާ ހަވާލުވާނީ ރިޒާވް ޓީމުގެ ކޯޗު އޮސްކާ ސަންޗޭޒް ކަމަށާއި، ކުލަބު ހިންގުމުގެ އައު އޮނިގަނޑު ވަރަށް އަވަހަށް އާންމުކުރާނެ ކަމަށް ވެލެންސިއާއިން މައުލޫމާތުދެއެވެ.

ކޯބެރަން ވެލެންސިއާއާ ގުޅުނީ 2024ވަނަ އަހަރުގެ ޑިސެމްބަރު މަހުގެ ތެރޭގައެވެ. އޭނާގެ ބެލުމުގެ ދަށުން އެ ފަހަރުގެ ސީޒަން 12ވަނައިގައި ނިންމައި ރެލިގޭޝަނުން ސަލާމަތްވިއެވެ. އަދި އޭގެ ފަހުން އައި ސީޒަން ނުވަވަނައިގައި ނިންމާލި ނަމަވެސް، މެސްޓަލާ ސްޓޭޑިއަމްގައި އޭނާ ގެންގުޅުނު ކުޅުމުގެ ސްޓައިލާމެދު ގިނަ ބަޔަކު ތިބީ ހިތްހަމަނުޖެހިފައެވެ. ނަތީޖާއެއްގެ ގޮތުން ފަހަކަށް އައިސް އަމިއްލަ ދަނޑުގައި ކުޅުނު މެޗުތަކުގައި ސަޕޯޓަރުން ދިޔައީ އޭނާ އިސްތިއުފާ ދިނުމަށް ގޮވާލަމުންނެވެ. ވެލެންސިއާގެ ކޯޗުކަމުގައި އޭނާ 72މެޗު ކުޅެފައިވާއިރު، 28މެޗުން މޮޅުވެ 26މެޗުން ވަނީ ބަލިވެފައެވެ.

އަނެއްކޮޅުން، ކުލަބުގެ ސީއީއޯގެ މަގާމަށް ގޯލޭ އައްޔަންކުރީ 2025ވަނަ އަހަރުގެ މެއި މަހުގައެވެ. އޭނާ ފާހަގަކުރެވިފައި ވަނީ، އާންމުންގެ ފާޑުކިޔުންތަކުގެ ތެރޭގައިވެސް ކޯބެރަންގެ ދިފާއުގައި ތަކުރާރުކޮށް ވާހަކަދެއްކި ފަރާތެއްގެ ގޮތުގައެވެ.