ބިލިއަން ޕައުންޑުގެ ސްކޮޑެއް އޮތް ލިވަޕޫލަށް ފާޑުކިޔުން

އިނގިރޭސި ޕްރެމިއާ ލީގުގައި ރެލިގޭޝަން ޒޯނުގައި އޮތް ފުލަމްއާ ދެކޮޅަށް އަމިއްލަ ދަނޑުގައި ކުޅެ ލަނޑެއް ނުޖެހި އެއްވަރުވުމާ ގުޅިގެން، ބިލިއަނެއްހާ ޕައުންޑުގެ އަގުބޮޑު ސްކޮޑެއް އޮތް ލިވަޕޫލަށް ވަރަށް ބޮޑަށް ފާޑުކިޔުންތައް އަމާޒުވެއްޖެއެވެ.

ފާއިތުވި ސީޒަނުގައި 417މިލިއަން އަދި މި ހިނގާ ސީޒަނުގައި 286މިލިއަން ޕައުންޑު ހޭދަކޮށްފައިވާއިރު، އެ ޓީމު މިވަގުތު އޮތީ ކުޅުނު ހަތަރު މެޗުން ލިބުނު ހަ ޕޮއިންޓާއެކު ތާވަލުގެ ހަވަނައިގަ އެވެ. ނަތީޖާ ގޯސްވުމުގެ ސަބަބުން އާނޭ ސްލޮޓް މަގާމުން ދުރުކުރުމަށް ފަހު އަންޑޯނީ އިރައޯލާއާ ޓީމު ހަވާލުކުރި ނަމަވެސް، ލިވަޕޫލަށް ދިމާވެފައިވާ މައްސަލަތަކަށް އޭނާއަށް ވެސް ހައްލެއް ހޯދިފައިނުވާކަމަށް އިނގިރޭސި ނޫސްތަކުން ދަނީ ރިޕޯޓުކުރަމުންނެވެ.

މެޗަށްފަހު ވާހަކަދައްކަމުން އިރައޯލާ ބުނީ، އަމިއްލަ ސަޕޯޓަރުންގެ ކުރިމަތީގައި ކުޅެ މޮޅު ނުވެވުމަކީ އެއްވެސް ހާލެއްގައި ބަހަނާ ދެއްކޭނެ ކަމެއް ނޫން ކަމަށާއި، ނަމަވެސް ކުޅުންތެރިންގެ ފަރާތުން ވަރަށް ބޮޑަށް ވަރުބަލިކަން ފެނިގެންދިޔަ ކަމަށެވެ. ޗެމްޕިއަންސް ލީގުގައި ބުދަ ދުވަހުގެ ރޭ ކުޅުމަށްފަހު ހޮނިހިރު ދުވަހު ލީގު މެޗަކަށް ނުކުތުމުން ފިޓްނަސް މައްސަލަތައް ދިމާވިކަން ފާހަގަކުރަމުން ކޯޗު ބުނީ، މެޗުގެ ޝެޑިއުލްއަށް ފާޑުކިޔަން ބޭނުންނުވާ ކަމަށާއި އެންމެ މުހިންމު ކަމަކީ ކުރިއަށް ކުޅޭ ކުޅުންތެރިންގެ ނިންމުންތައް ގޯސްވުންކަމުގައެވެ.

ރެއާލް މެޑްރިޑަށް ކުރިން ކުޅުނު އަލްވާރޯ އާބެލޯއާގެ އިރުޝާދުގެ ދަށުން ކުޅެމުންދާ ފުލަމްގެ ޑިފެންސަށް އިރައޯލާ ވަނީ ވަރަށް ބޮޑަށް ތައުރީފުކޮށްފަ އެވެ. އޭނާ ބުނީ ވަކިވަކި ކުޅުންތެރިންނަށް ބަރޯސާވުމުގެ ބަދަލުގައި ލިވަޕޫލުން ޓީމެއްގެ ގޮތުގައި މަސައްކަތްކޮށްގެން ނޫނީ ކާމިޔާބީއާ ހަމައަށް ނުދެވޭނެ ކަމަށެވެ. ލިވަޕޫލް ހުއްޓުވައިގެން ހޯދި މުހިންމު ޕޮއިންޓާއެކު ފުލަމް މިހާރު އޮތީ 20ޓީމު ވާދަކުރާ ލީގުގެ 18ވަނައިގައެވެ.