ސެނެގޯލްގެ އައު ކޯޗަކަށް ޕެޓްރިކް ވިއޭރާ

ވޯލްޑް ކަޕްގެ ދެވަނަ ބުރުން ސެނެގޯލް ކެޓުމާ ގުޅިގެން ކޯޗުގެ މަގާމު ހުސްވުމާ އެކު، ފްރާންސްގެ ޤައުމީ ޓީމުގެ ކުރީގެ ތަރި ޕެޓްރިކް ވިއޭރާ އެ ޤައުމުގެ ސީނިއަރ ފުޓުބޯޅަ ޓީމުގެ ހެޑް ކޯޗަކަށް ހަމަޖައްސައިފިއެވެ.

ސެނެގޯލްގެ ވެރިރަށް ޑަކާރަށް އުފަން ވިއޭރާ މި ފުރުސަތު ހޯދީ، ކުރިން އެ މަގާމުގައި ހުރި ޕާޕޭ ބޫނާ ތިއޯ މަގާމުން ދުރުވުމުންނެވެ. ސެނެގޯލްގެ ފުޓުބޯޅަ ފެޑެރޭޝަނުން މީސްމީޑިއާ މަންސަ އެކްސް މެދުވެރިކޮށް މިކަން އިއުލާނުކޮށްފައިވާއިރު، އައު ކޯޗު ރަސްމީކޮށް ތައާރަފުކުރުމާއި އޭނާގެ ޒިންމާތަކުގެ ތަފުސީލުތައް ކުރިއަށް އޮތް ތާނގައި ހާމަކުރާނެކަން ވަނީ އަންގާފައެވެ.

އައު ކޯޗުގެ ބެލުމުގެ ދަށުން ސެނެގޯލް ކުޅޭ ފުރަތަމަ މެޗުތައް އަންނަ މަހުގެ ބައިނަލްއަގުވާމީ ބްރޭކުގައި ފެނިގެންދާނެއެވެ. މިއީ 2021ވަނަ އަހަރުގެ އެފްރިކާ ކަޕް އޮފް ނޭޝަންސް ކާމިޔާބުކުރި ޓީމުން 2027ވަނަ އަހަރުގެ މުބާރާތަށް ތައްޔާރުވުމުގެ ގޮތުން ފަށާ ދަތުރުގެ ފެށުމެވެ. އެ މުބާރާތަށް ކޮލިފައިވުމަށް ކުޅޭ މެޗުތައް ސެޕްޓެމްބަރު މަހު ފެށުމަށް ވަނީ ތާވަލުކުރެވިފައެވެ.

އުމުރުން 50އަހަރުގެ ވިއޭރާ މީގެ ކުރިން ވަނީ ޔޫރަޕުގެ ބޮޑެތި ލީގުތަކުގައި ކޯޗުކަން ކޮށްފައެވެ. އޭގެ ތެރޭގައި އިންގްލެންޑުގެ ކްރިސްޓަލް ޕެލަސް، ފްރާންސްގެ ނީސްއާއި ސްޓްރާސްބޯގް، އަދި އިޓަލީގެ ޖެނޯއާގައި ހޭދަކުރި ކުރު މުއްދަތު ހިމެނެއެވެ. ނަމަވެސް މިއީ އޭނާ ޤައުމީ ޓީމަކާ ހަވާލުވި ފުރަތަމަ ފަހަރެވެ.

ކުޅުންތެރިއެއްގެ ގޮތުގައި އޭނާ ވަނީ ފްރާންސާއެކު 1998ގެ ވޯލްޑް ކަޕާއި 2000ގެ ޔޫރޯ ކާމިޔާބުކޮށް، 100އަށް ވުރެ ގިނަ މެޗު ކުޅެދީފައެވެ. ހަމައެހެންމެ، އިނގިރޭސި ކުލަބު އާސެނަލްގައި އޭނާ ހޭދަކުރި ކާމިޔާބު ދުވަސްވަރު 400އަށްވުރެ ގިނަ މެޗު ކުޅެ، ޕްރިމިއަރ ލީގުގެ ތަށި ތިން ފަހަރު އުފުލާލައިފައިވެއެވެ.