ދިވެހިރާއްޖޭގެ ރާޅާއެޅުމުގެ ކުޅިވަރު ކުރިއެރުވުމަށް ގިނަގުނަ މަސައްކަތްތަކެއް ކޮށްދެއްވާފައިވާ މޯލްޑިވްސް ސާފިން އެސޯސިއޭޝަން (އެމްއެސްއޭ)ގެ ރައީސް މުޙައްމަދު ސޮބާހު (ޗޭ)، ބައިނަލްއަޤުވާމީ ފެންވަރުގައި ލިބުނު ބޮޑު ކުރިއެރުމަކާ އެކު އޭޝިއަން ސާފިން ފެޑެރޭޝަން (އޭއެސްއެފް)ގެ ނައިބު ރައީސްކަމަށް އިންތިޚާބުކޮށްފިއެވެ.
މި މުހިންމު މަގާމަށް އޭނާ އިންތިޚާބުވެވަޑައިގެންފައިވާއިރު، މީގެ ކުރިން ސޮބާހު ވަނީ އޭއެސްއެފްގެ ހިންގާ ކޮމިޓީގެ މެންބަރުކަން ވެސް ކުރައްވާފައެވެ. އަދި އޭނާއަކީ 2021ވަނަ އަހަރުން ފެށިގެން މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ އެކްސްކޯގައި ވެސް ހިމެނިވަޑައިގަންނަވާ ތަޖުރިބާކާރު ބޭފުޅެކެވެ.
އޭނާގެ ޒަޢާމަތުގައި 2019ވަނަ އަހަރުން ފެށިގެން އެމްއެސްއޭއިން ވަނީ ބޮޑެތި ކާމިޔާބީތަކެއް ހާސިލުކޮށްފައެވެ. މިގޮތުން، ޤައުމީ ފެންވަރުގައި ދިވެހި ސާފް ލީގު ތަޢާރަފުކުރުމާއި، ބައިނަލްއަޤުވާމީ ފެންވަރުގެ މުބާރާތްތައް ކަމަށްވާ އޭޝިއަން ސާފިން ޗެމްޕިއަންޝިޕް ވިދިވިދިގެން ދެ އަހަރު ރާއްޖޭގައި ބޭއްވުމުގެ އިތުރުން، އޭޝިއަން ގޭމްސްއިން ދިވެހި ރާޅާއެޅުންތެރިންނަށް ޖާގަ ހޯދައިދިނުން ހިމެނެއެވެ. ހަމައެހެންމެ، އެތުލީޓުންނާއި ޓެކްނިކަލް އޮފިޝަލުން ތަމްރީނުކުރުމުގައިވެސް ސޮބާހު ވަނީ ފާހަގަކޮށްލެވޭފަދަ މުހިންމު ދައުރެއް އަދާކުރައްވާފައެވެ.
މި ފަޚުރުވެރި ކާމިޔާބީއާ ގުޅިގެން، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވަނީ ސޮބާހަށް މަރުޙަބާ ވިދާޅުވެފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.