ބޫޓާނުގެ ވެރިރަށް ތިމްޕޫގައި ކުރިއަށްދިޔަ ސައުތު އޭޝިއަން ފުޓްބޯޅަ ފެޑެރޭޝަން (ސާފް)ގެ ކޮންގްރެސްގައި، ވާދަވެރިޔަކާ ނުލައި އެ އިދާރާގެ ރައީސްކަމުގެ ފަސްވަނަ ދައުރަކަށް ބަންގްލަދޭޝްގެ ކާޒީ ސަލާހުއްދީން އިންތިޚާބުކޮށް، ހިންގާ ކޮމިޓީގެ މެންބަރުކަމަށް ރާއްޖޭގެ ހުސައިން ޝާފިއު (ކޮކީ)އައްޔަންކޮށްފިއެވެ.
ދެކުނު އޭޝިއާ ސަރަހައްދުގެ މައި ފުޓްބޯޅަ އިދާރާގެ އެންމެ އިސްވެރިޔާގެ މަގާމަށް ބަންގްލަދޭޝް ފުޓްބޯޅަ ފެޑެރޭޝަނުގެ ކުރީގެ ރައީސް ސަލާހުއްދީން އަލުން ހަމަޖެހިގެންދިޔައީ އެ މަގާމަށް އިތުރު ފަރާތަކުން ކުރިމަތިލައްވާފައި ނުވުމުންނެވެ. އޭނާއަކީ މީގެ ފަނަރަ އަހަރު ކުރިން، 2009ވަނަ އަހަރުން ފެށިގެން ސާފްގެ ރައީސްކަން މެދުކެނޑުމެއްނެތި އަދާކުރައްވަމުން ގެންދަވާ ތަޖުރިބާކާރު ބޭފުޅެކެވެ.
ސާފްގެ ހިންގާ ކޮމިޓީ ނުވަތަ އެކްސްކޯގައި ރާއްޖެ ތަމްސީލުކުރައްވާނެ ޝާފިއުއަކީ މިވަގުތު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނައިބު ރައީސްގެ އިތުރުން ރާއްޖޭގެ ފުރަތަމަ ޑިވިޝަނުގެ ގަދަބާރު، މާޒިޔާ ސްޕޯޓްސް އެންޑް ރެކްރިއޭޝަނުގެ ސީއީއޯގެ މަގާމު ވެސް ފުރުއްވަމުން ގެންދަވާ ފަރާތެކެވެ.
މި ފަހަރުގެ ކޮންގްރެސްގައި އިންތިޚާބުކުރި ހުރިހާ މަގާމުތަކަކަށް ވެސް ކުރިމަތިލައްވާފައި ވަނީ އެންމެ ކެންޑިޑޭޓެކެވެ. އޭގެ ތެރޭގައި ރައީސްގެ މަގާމާއި، ދެ ނައިބު ރައީސުންނާއި، ހިންގާ ކޮމިޓީގެ ތިން މެންބަރުންގެ އިތުރުން އަންހެން މެންބަރެއްގެ ގޮނޑި ވެސް ހިމެނެއެވެ. އެހެންކަމުން ވޯޓަކަށް ނުގޮސް ހުރިހާ ބޭފުޅުންނަށް ވެސް ވަނީ މަގާމުތައް ކަށަވަރުވެފައެވެ.
ސަލާހުއްދީން އިތުރު ދައުރަކަށް އިންތިޚާބުވެވަޑައިގަތުމުން ސާފްގެ ފަރާތުން އާންމުކުރި ބަޔާނެއްގައި ވަނީ އޭނާއަށް ހޫނު މަރުހަބާއެއް ކިޔާފައެވެ. އެ އިދާރާއިން ފާހަގަކުރި ގޮތުގައި މިއީ ސަރަހައްދީ ފުޓްބޯޅަ ކުރިއެރުވުމަށް ސަލާހުއްދީން ގެންގުޅުއްވާ ހަރުދަނާ ތަސައްވުރާއި ކުރައްވާ ބުރަ މަސައްކަތުގެ އަލިގަދަ ހެއްކެކެވެ. އަދި އައު ދައުރުގެ ތެރޭގައި ދެކުނު އޭޝިއާގެ ފުޓްބޯޅަ އާއިލާއަށް އިތުރު ކުރިއެރުމާއި އެއްބައިވަންތަކަން ލިބިގެންދާނެކަމަށް އުއްމީދުކުރާކަމަށް ވެސް އެ މެސެޖުގައި ބަޔާންކޮށްފައިވެއެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.